Café, d'Antón García

Bien que lo sé, de nuevo vuelve'l sol
a dexar nel so sitiu l'alcordanza.
Pasen aduces la lluz y les hores
y otra vez prenden l'amor nos tos llabios.
Depués de too, nun tengo más coses
qu'aquelles que quiero soñar.
Por eso nesti momentu imaxino un café
con visillos y meses de madera;
un poco xelo seríen los vidros
si fuera marzo. Tu dexes qu'esfreza
la taza. Llega la nueche en silenciu.
Pero güei (agosto va entrar mañana)
l'único xelo dílese nel altu
vasu del whisky y enfrente una música
de jazz ocupa'l to sitiu valeru.
Porque nun tengo más nada qu'aquello
que quiero, güei tas comigo. Mañana,
si quier, que vuelva l'olvidu besame.

Antón García

(Los díes repetíos, 1989)