espierta nos patios tres un balón de reglamentu
y tovía yera mayu, en 1975,
cuando la lluz de les faroles
echaba la so sombra pelos años en cisgua
y había que dise escapaos pa en casa,
que mañana ye día d'escuela.
Porque intentábamos entender lo qu'escondíen
nel so corazón de lluvia les palabres suaves del silenciu.
Esplicar, a dures penes, el lloru cenciellu d'aquellos díes,
l'allegría violento y súbito: imaxe d'unes memories
que no vacío pugnen por concretase.
(El mio corazón ye esi escolín que llora
nel requexu escuru de la escuela)
Depués yá noviembre. Y llegaben noticies de llonxe que falaben
d'una muerte densa, opaca, nun sé,
noticies verdes como'l mofu na piedra, noticies azules
como los güeyos d'una nueche llarga y llienta,
tampoco nun sabría dicivos agora, que confusamente remembro,
cómo'l tiempu foi pasando hasta güei
si el tiempu daquella inda nin esistía y la lluna,
la lluna yera un platu llechi onde los gatos diben a beber.
Xuan Bello
(El llibru vieyu, 1994)
No hay comentarios:
Publicar un comentario