¿El tiempu?, de Mª Esther García López

Dende la esquina del iviernu, contemplo'l tiempu.
La vida que caleya por tolos requeixos.
Los años al ḷḷombu. Los años vieyos.
La ḷḷuz, débil, cuélase polas ventanas de los árboles.
El cielu chapicáu de nubes.
El vuelu de los páxaros. Dibuxos nel cielu.
Contemplo'l tiempu. Escuco la intimidá de la cai.

¿El tiempu? Naide pue detenelu, eufóricu, atayando por caminos ya carreiros.
¿El tiempu? You, n'ayén. ¡Nun quiero reconocelu!

¿El tiempu?

Un vieyu, apoyáu nel cayáu, a pasu lentu.
—¿El tiempu?
—Sí, el tiempu. El tiempu ya un momentu. Un sueñu, un inventu.

Un nenu crucia la cai en patinete, fai esparabanes, feliz...
—¿El tiempu?
—Ta mui ḷḷonxe, nun lu veo, nin lu siento. El tiempu ya mui lentu. Voi a priesa nel patín, ya ríome... adelántolu corriendo.

Una pareya, namoraos, bésanse nos ḷḷabios, nas mexellas, nas manos, no pelu... besuquéanse tol
cuerpu.
Besos ḷḷargos, ḷḷarguísimos... un minutu, dos minutos, una hora...
—¿El tiempu?
—Non, nun lo conocemos. Ta mui ḷḷonxe. Inda nun vieno.

¿El tiempu?

Dende la esquina del iviernu, contemplo'l tiempu.

—¿El tiempu?
—Salúdolu en silenciu. Cuando me ḷḷevanto, cuando me deito, cuando duermo, cuando espierto.
Cuando voi, ya cuando vengo.
¿El tiempu?
Compañeiru inseparable que nos ḷḷieva pola sienda de la vida, en silenciu.
Pasa rápido ou pasa lento.
¿Ya real? ou ¿ya un inventu?

Mª Esther García López

(Lletres Lliterariu nº 4, Academia de la Llingua Asturiana, 2012)