Énte la mirada asombrada d'un nenu,
la primer tormenta vivida en campu abiertu
ye ver horrorizáu cómo'l mundu se destrúi:
tremen los cimientos de la tierra
y l'ecu espantible del estrueldu solmena los cielos,
enciéndelos y vuélvelos escuros,
esborónase l'infinitu, cai too delío en torrenciales
columnes de turbión y borrina,
ye'l fin de toles coses y nun hai nengún abelu
cerca onde guarecer.
Depués la tormenta asela,
abocanen los cielos, pinguen
les últimes goteres y un rellumu de sol
ruempe'l cercu de nubes pa volver
a ordenar el mundu cola so lluz.
Cada día sorpréndenos una tormenta
en campu abiertu, albintestate de la vida,
cada día vemos espantaos cómo s'esbarrumba
el mundu y cómo toles coses, nós mesmos,
caemos nun torbolín imparable dica'l final.
Y cada día abocana la catástrofe,
vuelve a nacer el mundu nel filu flebe
d'un rellumu de sol, dica la prósima tormenta.
Pablo Antón Marín Estrada
(Los baños del Tevere, 2003)
No hay comentarios:
Publicar un comentario