cola mesma llamada qu'otra vez les sintiera.
Ye mui serio, yá nun val la buscapina
inyectada con tol amor,
l'amor que suplantaba lo qu'entós nun tenía:
la música de madre que dexó de cantar
y me dormía feliz con una nube azul y nielda.
Porque años atrás vía les primaveres que nacíen en febreru,
garra una pa ti, pa llevala pa casa —dicía mio madre—.
A padre gustában-y les violetes, más tardíes y menos abondoses.
Y yo diba medrando, "va tirar a so padre esa rapacina,
ye mui alta pa los años que tien". Yo enredaba tovía,
ayena a aquella infancia que diba amostalgando.
Tiempu depués, enantes dir a escuela pela tarde,
sentí que desapaecíen les ganes de blincar
y qu'entá me quedaben los meses de violeta y primavera
y los mios padres.
Después la buscapina, a los dieciocho años, inyectada
con tol amor, l'amor que suplantaba tol amor que perdiere,
el "has de tar tranquila, son unes hores, y ye que delles muyeres
tienen bien mala suerte hasta pa esto".
Y agora namás les notes, les impresiones planes que te filtra'l dolor;
el sabor duce que me trayía la nielda y valía como bálsamo
de lo que foi inocencia. Namás esos colores mariello y malva,
ensin saber.
¿Por qué la buscapina yá nun te ye remediu?
¿Ónde'l tiempu de malva y primavera
y la voz recurrente y la música?
Too quedó tres de ti, na memoria francida
que tienes de depués y cuentes como agrio
nun aparte.
Ehí, nun tiempu de depués,
al que dacuando allegues con un poco de pena
y abonda señaldá pa qu'estos díes nun muerran
hasta nun morrer tu,
mientres t'agarres, más consciente que nunca, a la infancia que foi,
enllena de trastaes, violeta y primavera.
Lourdes Álvarez
(Poesía escoyida 1985-1997, 1997)
No hay comentarios:
Publicar un comentario