Las duas falas astures de Galo Fernández "Fernán Coronas" (1884-1939)

Nun ya una infantina sola,
son duas hermanas ximielgas
las infantinas astures
encantadas nuna cueva,
pechadas cun seite chaves
pu'lus mourus desta tierra.

Anos fay que choran, choran
sin que una de l'outra sepa,
que las tienen extremadas
cada cuala nuna veira
dun rigu que viu fundise
todas las sus pontes vieyas.

Llibrade a las infantinas
desa carcelona prieta
pa que volvan entronáse
nu Principau que ya dellas,
ya entrambas unames reinen
pa que Asturies seya nuesa.

Llibrade a las infantinas
que, cuandu ellas llibres tean,
llibre ha quedá la Tierrina
pa viví la estoira nueva
noutra dómina sllendiente,
cun escampaneus de fiesta.

Padre Galo Fernández, "Fernán Coronas" (1884-1939)

(Ed: Fernán Coronas, Padre Galo Fernández. Poesía asturiana y traducciones, Trabe, 1993)