Instantes de la tarde, de Roberto González-Quevedo

Nun yera l'andar de la mañana,
cuando las castañales
amiran alieḷḷas la esperanza.

Tampocu yera
un sendeiru ḷḷentu
nin la ḷḷuz del urbachu,
al espurrise los salgueiros
ya pingar un aire de frescura
de las fuechas de los freisnos.

Non. Yera más bien la tarde,
la que chega cargada d'esperiencia
ya nun yía p'aguantar en sí
los mensaxes mui fondos
qu'escuenden las horas detenidas.

Yeran los instantes nos que'l corazón
tien ganas d'escuitar
ya tamién de contar
lo que dicen las cartas,
qu'anadan polas folas
de los ḷḷatidos que baten l'alma.
(Alma batida mientras el sol da
vueltas al rodenu de la vida).

Ya tu caminabas
un pouco separtada.
Escochendo moras.
Afalagando los muruéndanos,
que diban ser, inxustamente,
una ufierta pa mi
na copa dorada de la vida.

Roberto González-Quevedo

(Lletres Lliterariu nº 4, Academia de la Llingua Asturiana, 2012)