La mio vida era lixera como un páxaru, de Miguel Rojo

Alcuérdome de nenu.
Aquel yera'l Tiempu.
Pero too eso pasó.
Nun recuerdo bien, sólo queda'l recuerdu
y esti ye mentirosu por vocación:
una vez soñé que yera Odiseu y les míos primes serenes,
Quería matales y después violales.
O al revés…
Nun recuerdo bien.
Yá dixe lo que de fulera tien la memoria.
Otra vez sentí que
tenía corríos munchos caminos.
El sol posábase nel arba de les zapiques
y ente los briellos aldovinábase
la espluma del llechi recién mocíu
u yo dexaba los llabios.
Había un xarrón d'allabastru. ¿Cómo
sedría la mano que posó flor?
¿Tendría l'arume que sólo da la xuventú
o sería mano d'abultaes venes
penada pol pesu los díes?
Tamién espié a Tasos cuando foi arreglase
el dentame a Atenes. Volaba
penriba les piedres y del mar.
"¡Ye tan guapo volvete a ver, amor!", dicía.
"Quiero que los míos dientes nuevos
solo muerdan caricia na to carne abierta,
mansos tigres pastiando tos llabios,
bebiéndote la voz
mientres sueñes con pexes,
allá
pa contra la historia,
allá
onde tovía les columnes busquen
el llivianu pesu azul del aire..."
Esto -y decía Tasos a la so amante
mientres la so muyer lu esperaba en casa
preñada de nueve meses.
Por entoncies, la mio vida yera lixera como un páxaru.

Miguel Rojo

(Territorios, 1980-2005)