Midida del tiempu, de Taresa Lorences

Clausurada tres las altas murias
de cristal, única na diversidá,
posible nos fragmentos,
en silenciu ruedas
el tou camín secretu y repitíu
al son de músicas agotadas,
Volver, volver, volver,
esperar
qu'una mano amiga ou enemiga
te permita recomponer el pasu.
Sólida na esencia del nome
de materia, arena
incapacitao pa esistir
en cada una de las partes,
llimíteste a cumplir el tou oficiu:
midir el tiempu d'un beisu,
la duración d'una vocal,
los años que pasan ensin xeitu.
Destín de banzáu ya vocación de ríu,
viérteste estéril nel montón hermanu,
sabiendo como sabes bien
que yá nun veis a nengún sitiu.

Taresa Lorences

(Sobre l'arena, 2003)