Poeta de moqueta, de Manuel Asur

"Pozu moqueta". Espresión de los mineros asturianos pa señalar les oficines d'Uviéu.

Prestábame adientrame pel vallín,
escapar a un requexu de verdores,
escaecer asina sinsabores
d'una fe d'oficina y de bombín.

Prestábame gozar de la mudanza,
escapar del reló de mediu día,
de la senda caleyera a la escondía,
avagar pela vega la vagancia.

Prestábame encuevame cola Deva,
escapar de los fíos de san Lluis,
de cangúelu de Cangues y d'Onís,
de la sonada ausencia del Auseva.

Prestábame l'idioma de la llosa,
la fala afalagada pola fiesta:
afogómela'l poeta de moqueta,
qu'a escaparina púnxo-y mariposa.

Manuel Asur

(Lletres Lliterariu nº 4, Academia de la Llingua Asturiana, 2012)