otra vuelta. D'estes ventanes siéntese
esmucise'l Mondegu, les palabres
de la xente qu'a poco y a poco
van arredolando'l branu,
camín quién sabe de qué destín qu'un día
podia entrellazase nun mesmu azar.
Restaurantes, tiendes de frutes, tabiernes
y mui bien cerca de la rúa Ferreira Borges
allumando pa siempre
de los mios secretos suaños
los más puros y encesos.
Mentes ella se desviste y dobla curioso
la ropa na siella, yo alcuérdome
de tantes veces que tuvi equí, nesta mesma pensión:
cumpliera dieciocho años nuna ciudá estraña
y cantando Summertime con Tony
—un angolanu que tuviera en Nueva York—
perdíme munches veces per eses cayines
qu'equí llamen becos y un sábadu
de vuelta a la pensión decatéme
que daqué cambiara pa siempre,
como si el mundu se fixara definitivo nel so exe
y tou respondiera a un azar calculáu. Acompañábenme
y yera la primer vez que dalquién me llevaba
de la mano a un cuartu que yera míu.
De la so piel blanquísima y la lluz roxa
que-y arramaba del cuerpu
poco recuerdo agora. Queda na alcordanza,
sí, otra vez na mesma pensión,
la imaxe d'unes cereces na ventana:
comprárales, pero escaeciérame
de comeles. Yá les formigues corríen per elles
corrompiendo una secreta y fresca duzura.
Xuan Bello
(Los caminos secretos, 1997)
No hay comentarios:
Publicar un comentario