Si digo llingua digo mar,
cantiles arispios
y agües insondables,
sableres anubríes pola nublina,
el vuelu aloriáu de les gaviotes,
el cantu azul
de los barcos balleneros,
el calor
llonxanu d'unes lluces
añándose nel agua.
Si digo llingua digo monte,
cumal gris,
escayu y soldedá,
el milagru del sol pente les nubes,
l'ausencia
infinita de les brañes,
una llueca, invisible
como un pasu perdíu,
el blancor
perfectu y ensin tacha de la nieve.
Si digo llingua digo pan,
camperes verdes,
caleya y soledá,
muyeres arroxando
cabo'l tiempu,
el toquíu espaciáu
de les campanes,
el sudor y la yerba
d'una tarde inorada
d'un agostu inclemente
y un neñu que s'escapa de la escuela
persiguiendo
una oveya afuxida.
Si digo llingua digo mundu,
digo cuerpu y trabayu,
enfotu y travesía,
la voz d'un home
—una vida ensin gloria—
del que naide s'alcuerda,
los llibros
—heraldos de la muerte—
que pueblen la mio mesa,
les palabres qu'escribo
—amor y soledá—
que quiciás nada nomen
y quiciás naide escuche.
Marta Mori
(Lletres Lliterariu nº 4, Academia de la Llingua Asturiana, 2012)
No hay comentarios:
Publicar un comentario