Vivo nun país
non tan grande
como pa mantener un zoo estatal
pero pequeñu
abondo
como pa que quede abierta una tienda d'animales
onde muerren galbanosos, más que nunca, los coneyos.
Vivo nun país pequeñu, y nuna cai pequeña:
vivo nuna mente pequeña
y tengo'l pie pequeñu.
Yo solu
nun soi quien p'abarcar tanta grandeza
como veo nos otros
nin tanta pequeñez
como ye la mía.
Pero vivo nuna ciudá pequeña
y el mio amor ye grande.
Riego'l mio amor
-él ye como una gran secuoya alta y que tien sede-
y camino
regando col mio amor los parques toos.
El mio amor
ye muncho menos qu'un funcionariu públicu.
El mio amor
podría metese nuna urna minúscula.
El mio amor
ye una peluquera semianalfabeta.
Vivo nun país pequeñu
y el mio amor
ye grande.
Pablo X. Suárez
(2011)
No hay comentarios:
Publicar un comentario