Dust in the Wind, de Pablo Antón Marín Estrada

We are dust in the wind.

The Kinks.

Estos díes, ¿qué quedará d'ellos?
        Pasará'l tiempu,
olvidaránse les hores
que-y arramplamos al tediu
pa ser felices y depués membrales
con señaldá:
los momentos que fueron malpenes
un rellumu de lluz nuna tarde gris.

Olvidaránse los nomes,
les vides que fuimos
a contrapelu de too y de toos,
los llabores secretos
de la nuestra tristura pa derromper
nueches y serondes
que veníen fríes, arispies,
con xarazu de nun vivir, con despidíes
xelaes.

                  Olvidaráse la palabra,
que prendió un versu
nel qu'escamplamos
la voz única del que quiximos ser
a destiempu de la realidá.
De tolo que fuimos y nun fuimos,
de tolo que dexamos fecho y por facer,
d'estos díes ¿qué quedará?

Quién nos diera ser otro,
polvo del camín, una nube
de povisa seco que llevanta
un carru al pasar
y queda un instante nel aire
y tembla y arde col oro del sol últimu.
Cualquier cosa primera qu'esti destín
ensin aldu, esti ecu ensin respuesta,
                  vacíu de sentíu.

Pablo Antón Marín Estrada

(Otra edá, 2000)