En provincies llonxanes, perdíu
per unes hores en ciudaes mugoses
y hostiles a les que fuimos
pa solventar estraños asuntos,
caleyando rúes fosques y desiertes,
alpenes escalecíes pol lume
vieyu de faroles mortecines,
ente cases más murnies,
vagos edificios escuros
onde alcuando rescampla'l calicor
d'una llámpara como l'arniu
de la desamparada vida
que vela xunta ella, el so llar
solitariu y apagáu. Andando
al debalu, ensin aldu, les cais
d'una d'eses villes levítiques
y misterioses, a la hora más triste,
por pasear la cena frugal
enantes de volver al hotel,
cuando too aselaba y cuantagüei
que llegara a la estación cercana
l'últimu tren, mientres pasaba
col canséu triar de les pantasmes
l'únicu taxi ocupáu de la ciudá,
solu como na muerte,
tengo sentíu palpir el corazón de la nueche,
sonaba sele como'l medrar de la herba
y del deséu, sutil y firiente como l'orpín
enxugando'l rostru secañosu de la soledá.
Pablo Antón Marín Estrada
(Los baños del Tevere, 2003)
No hay comentarios:
Publicar un comentario